بين اللسان والقلم والكيبورد

سلام عليكم

حقيقة موضوع التعبير عن الراى او توصيل فكؤتك ووجهة نظرك شاغلنى جدا جدا اليومين دول

يعنى مثلا الواحد فينا يملك وسائل ايه للتعبير بيها عن نفسه وعن فكرته

قلت اول وسيلة الواحد ممكن يملكها هى اللسان حيث انه اسهل وسيلة واقرب وسيلة و اسرعهيعنى مثلا انك تيجى تكلم واحد احسن ما تكتبلة جواب احسن ما تكتب له ميل يعنى بمعنى اوضح

ان طريق التواصل وجها لوجه هى اقرب واقصر الطرق اللى تقدر تعرف توصل بيها مضمون فكرتك وتقدر تناقشها وتجادل فيها لكن

عندما لا تستطيع المواجهة وجها لوجه تقدر تكلمة مثلا تليوفنيا وبرضه ده وسيلة من وسائل توصيل فكرتك

لكن بصراحه وبالنسبة لى على الاخص الاصعب على الاطلاق هو توصيل فكرتك عبر الكتابة ويزداد الامر صعوبة عند الكتابة على الكيبورد

وبصراحه ولحد دلوقتى المشكلة ديه بتواجهنى انى فعلا مش بقدر اوصل المعلومة او الفكرة كاملة عن طريق الكتابة لكن لو لقيت الشخص امامى فعلا مبسيبوش الا لما يكون مقتنع ميه فى الميه او على الاقل متقبل وجهة نظرى

عموما برضه

بحس فى الكتابة هروب من الواقع او تقدر تقول هروب من المواجهة

عن طريق ان انت ممكن تكون متملكش الرد فى الوقت الحالى او عندك خجل من المواجهة وعلى فكرة ده شئ منتشر

وعموما برضه لما نيجى نتكلم عن الكتابة على الكيبورد

حتلاقى نفسك بتحاول توصل معلموتك عن طريق عالم خيالى هو الانترنت

عن طريق المنتديات والمدونات او حتى الاميلات

حتلاقى كل الوسائل ديه بتنقلك من عالم واقعى انت عايش فيه ومحتك بيه ومش قادر تواجه لعالم خيالى انت خلقته لنفسك او تحاول الهروب فيه لتقديم شخصية انت ترغب فيها وتحاول توصلها وبتلاقى فشل فى الطبيعة انك توصل للشخصية ديه

بمعنى اوضح

فكرة الهروب من الواقع لايجاد عالم جديد تقدر تبرز فيه مواهبك وافكارك و شخصيتك اللى فشلت انك تعملها على ارض الواقع هى فكرة

اراها تؤثر بالسلب على الشخصية ولك لعدة اسباب بسيطة

اولا

انت بتفرض على نفسك طوق من الانعزالية والوحده

ثانيا

تقمص شخصية انت مش هى الشخصية ديه يسبب اليك نوع من الاحباط الداخلى الى بيؤثر عليك فى انتاجك فى العالم الواقعى سواء كان انتاجك ده فكرى او عملى

ثالثا

وممكن تكون ديه نقطة ايجابية وسلبية فى نفس الوقت انك بتكتشف فى نفسك مواهب وافكار جديدة ولكن المشكلة انك مش قادر توقعن هذة المواهب والافكار

وبعد ده كله بتقع فى دوامة نقد الذات او جلدها والاحساس بالضعف والهروب

واخيرا وليس اخرا حاسس انى معرفتش اوصل فكرتى برضه

على العموم لو حد فهم انا كاتب ايه يا ريت يشاركنى برايه

امتحانات امتحانات امتحانات (تدوينة مرعبة

اليومين دول موسم امتحانات يا جدعان يعنى صباح القرف اللى الواحد فيه الواحد مبيلحقشي ياخد نفسه يلاقى الامتحان اللى وراه على طول تعرفوا بفتكر مين فى الموقف ده

بفتكر علاء ولى الدين ربنا يحمه فى فيلم الناظر لما الواد قعد يضرب فيه فقاله كابتن هو كله ضرب ضرب ضرب مفيش شتيمة

اه ده اللى بيحصل فينا بالظبط من الدكاتارة بتوع ام الجامعة ديه بصراحه الواحد اتخنق منها

مش عارف ساعات بحس كده انهم بينافسوا بعض مين يجيب اصعب امتحان فيهم

عاندهم سادية عجيبة فى تعذيب الطلبة

والتنكيد عليهم طول الاجازة

المهم بقى وانا قاعد كده بشرب سينالكو فى البلكونة –عشان البيبسى مقاطعة- المهم

وانا قاعد بشرب سينالكو فى البلكونة

اذ انه نسمه هوا ساقعه هبت فجاءَ فرحت فى النوم ورايت الاتى

دكتورة حنان الليثى دكتورة السيوتكس

والتى يتشرب مرارها كل من اوقعه حظه العثر فى التعامل معاه فى

اى جامعة من الجامعات التى تدرس فيها بسم الله ما شاء الله يعنى مبنقش ولا حاجه

المهم نرجع لمرجوعنا

خير اللهم اجعل

ه خير لقيت دكتورة حنان الليثى قاعدة على قمة اجتماع يجمع دكاترة ومعيدين القسم بتاعها

وبتديهم تحذير شديد اللهجة

وبتقلوهم بقولك ايه يا بنى انت وهو

اه متستغربوش

معلهش هما اه دكاترة بس هي تحس انها جاية من سوق الخضار معَلمة يعنى

المهمم بقولك ايه يا بنى انت وهو

اللى حيجيب فيكم سؤال سهل فى الجزء بتاعه حديله جزا واحتمال اعضه اه

واسهل سؤال حلاقى الطلبة جايبين فيه درجات كويسه

صاحبه حيمشي من الجامعة بكره الصبح اه

انا ميعجبنيش الحال المايل

المهم ولقيت الدكاترة بيبصولها نظرة رعب

وكل بيقولها تمام يا ريسه حننفذ الاوامر

وطبعا جيه الامتحان ونزل على العيال

كالصاعقة

اللى عمال يضحك ضحك هيستيرى وجايله بهبل

واللى عمالة تعيط وتقول هو ده سيوتكس ولا ايه بالظبط

واللى نزل عليه سهم الله وطالع على السطح ينتحر يعنى تباين

فى المشاعر لنفس السبب الصدمة

كان شعار هذا الامتحان الصدمة و الرعب

المهم صحيت من النوم لقيت صاحبى اللى قاعدد معايا فى الشقه

بيقولى يا بنى قوم ذاكر ديه حنان مستحالفلكم قلتله لا حرام متقولش انت كمان حلمت بيها يالهوىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىى

اآآآآآآه يا عربيتى (تدوينة مبكية

سلام عليكم

اليومين دول بمر بمرحلة وحشه اوى حالتى النفسية سيئة اوى

بعت العربية

رفيقة الكفاح

اللى رحمتنى من الموصلات وبهدلة مكروباصات العاشر وبتوع اجرة سوهاج

اللى خلتنى احس نفسي فى طبقة تانية قوق المجتمع :)

اللى ياما رحمتنى من الوقفة فى طابور حجز التذاكر وانا راجع السويس

اللى كانت حتجيبلى سرطان فى الرئة

واللى ياما ورتنى ايام وليالى اسود من قرن الخروب

اللى كانت بتعمل معايا فصول بايخة كل فصل وفصل انقح من القبليه

اللى وقفت بيا مرة انا وصاحبى منير فى وسط الضلمة فى الدائرى مكنتش عايزة تتحح الكلام ده كان الساعة 2 الفجر

وانا ببيعها والله ما كنتش هاينة عليا

كنت حاسس بيها بتقولى حرام عليك هانت عليك العيش والدخان

لدرجة انى يوم بيعها كل حاجه باظت واتكسرت فيها وكانها مقبلة على الانتحار حزنا انى سيبتها

بس اخوكم سيطر على المشاعر ديه كلها وافتكرت كل موقفها البايخة معايا وعزمت وتوكلت

انى خلاص لازم تيجى اللحظة اللى نفترق فيها احمد منى معلهش بقى اصلى كنت مسميها منى

على اساس انى اسمى احمد

يعنى شوية تراجيديا

مقلتلكمش بقى على نوع العربية

بولونيز

يقال عليها لفظ غير لطيف بالمرة فى اوساط المهتمين بالسيارات فى مصر

مكروه من كل من ركبها او حاول ركوبها او مقبل على ركوبها

معبودة الجماهير فى بلدها الاصلى لدرجة ان اسمها مشتق من اسم البلد نفسه

كانت حتت داهية تمشى فى الشارع متخفش من اى حد اى حد كائنا من يكون لو حتى ميكروباص اتوبيس نص نقل الكل فى الشارع خايف منك وانت ماشي معظم الناس تلاقيها بتبصلك بحقد دفين على اساس ان معظهم عربياتهم مخبوطة قبل كده من البلونيز

هى بلا منازع دراكولا الشارع المصرى فى الحقيقة

. تخش فيها فى الرصيف تلاقى الرصيف اتكسر

عمود نور تلاقيه ثنى

اى حاجة متقلقش .

معظم اللى موجود منها حاليا دواخلها فابريكا قليلا ما العربية تتشلفط فى حادثة وتحتاج ترش دواخل .

المهم بقى اهى راحت لحال سبيلها ادعولها بقى ربنا يباركلها مع صاحبها الجديد

بسم الله نبدا (التدوينة الافتتاحية)

بسم الله نبدا

وبما ان ده اول دخلة ليا فى عالم المدونات احب امسي واصبح على كل المدونين الحلوين

ما علينا

حتكلم على موضوع انا شايفه مهم اليومين دول كده والدنيا مشعللة

الموضوع القضية الفلسطينية بين التأييد الشعبى والقبول الدولى

طبعا كلنا سمعنا و شوفنا وقرينا على اللى حصل فى غزة والضفة الايام اللى فاتت وبعيدا عن جميع المستجدات و والاخبار الحالية , نركز على مستقبل القضية ككل .

اولا : مستقبل القضية الفلسطينية واستمرار الدعم الشعبى لها

بعد الكلام اللى حصل فى فلسطين العشر شهور الللى فاتوا كلها اكاد اجزم بان التاييد الشعبى لمناصرة القضية الفلسطينية الان فى ادنى مستوياته تسمع اللى يقولك يا عم دول بيتخانقوا على السلطة و حرب فرض سيطرة وتلاقى واحد تانى يقول هو ايه اصلا للى دخل حماس فى الموضوع ما هم كانوا بيحربواسارئيل من ساعة ما جم فى الحكومة وعمليتهم قليلة وكلام كتير على هذة الشاكلة وطبعا متحاولش تقوله دول حماس كويسين وفتح ووحشين وهما اللى عاملين فتنة حيرد عليك يقولك اه عشان انت بس اخوانجى بتدافع عنهم لكن بصراحة الاتنين عكوها وبصراحة الراجل عنده حق عايزينه اقوله ايه يعنى ما هو شايف ك شوية يقوموا يتعاركوا وطبعا اسرائيل هى المستفيد الاكبر من الكلام دهعلى العموم بصراحه كده وعلى بلاطة الموضوع محتاج مجهود كبير جدا عشان نرجع المصداقية بتاعت القضية الفلسطينية المفقودة لدى الناس تانى يعنى الناس معدش يهمها لو اسرائيل دخلت بكره على غزة حيقولوا احسن عشان كانوا بيقتلوا فى بعض المهم ما علينا من موضوع التاييد الشعبى ده

ثانيا : القبول الدولى

طبعا احنا شايفين من اول ما حماس مسكت الحكومة بس حصار اقتصادى رهيب عليها وقطع للمعونات وتجويع وتركيع للشعب واحنا احترامنا حماس لصمودها امام كل الضغوط ولتنازلها عن السلطة المطلقة لتكوين حكومة وحدة وطنية بس بصراحة بعد اللى حصل ده كلو كلام فى الهوا فشنك يعنى لا وطنية ولا اى حاجة ديه ناس بتكره بعض اشاسا يعنى دلوقتى الناس اللى كانوا ممكن بيايدوا القضية الفلسطينية و لو مهجموهاش على الاقل مش حيدعموها تانى حيقول هو فى عقل باله يا عم ديه عالم عالم تالت متخلفين بيعضوا فى بعض حتقلولى زى مين مثلا حقولكم زى شافيز

بعيدا بقى عن كل الكلام الهايف اللى فوق ده عايزكم تتاملوا مدى الكره بين فتح وحماس

حديكم روابط لمنتديات فتحوية وحمساوية

دول بيقولو على دول انقلابيين

والتانيين يقولوا عليهو شيعة و دعاة جهنم و اتباع المجحوم

المنتدى الحمساوي

http://www.paldf.net/forum/

المنتدى الفتحاوى

http://www.fatehforums.com/

حتلاقى الضديين بالظبط

وفى الختام سلام