سلام عليكم
حقيقة موضوع التعبير عن الراى او توصيل فكؤتك ووجهة نظرك شاغلنى جدا جدا اليومين دول
يعنى مثلا الواحد فينا يملك وسائل ايه للتعبير بيها عن نفسه وعن فكرته
قلت اول وسيلة الواحد ممكن يملكها هى اللسان حيث انه اسهل وسيلة واقرب وسيلة و اسرعهيعنى مثلا انك تيجى تكلم واحد احسن ما تكتبلة جواب احسن ما تكتب له ميل يعنى بمعنى اوضح
ان طريق التواصل وجها لوجه هى اقرب واقصر الطرق اللى تقدر تعرف توصل بيها مضمون فكرتك وتقدر تناقشها وتجادل فيها لكن
عندما لا تستطيع المواجهة وجها لوجه تقدر تكلمة مثلا تليوفنيا وبرضه ده وسيلة من وسائل توصيل فكرتك
لكن بصراحه وبالنسبة لى على الاخص الاصعب على الاطلاق هو توصيل فكرتك عبر الكتابة ويزداد الامر صعوبة عند الكتابة على الكيبورد
وبصراحه ولحد دلوقتى المشكلة ديه بتواجهنى انى فعلا مش بقدر اوصل المعلومة او الفكرة كاملة عن طريق الكتابة لكن لو لقيت الشخص امامى فعلا مبسيبوش الا لما يكون مقتنع ميه فى الميه او على الاقل متقبل وجهة نظرى
عموما برضه
بحس فى الكتابة هروب من الواقع او تقدر تقول هروب من المواجهة
عن طريق ان انت ممكن تكون متملكش الرد فى الوقت الحالى او عندك خجل من المواجهة وعلى فكرة ده شئ منتشر
وعموما برضه لما نيجى نتكلم عن الكتابة على الكيبورد
حتلاقى نفسك بتحاول توصل معلموتك عن طريق عالم خيالى هو الانترنت
عن طريق المنتديات والمدونات او حتى الاميلات
حتلاقى كل الوسائل ديه بتنقلك من عالم واقعى انت عايش فيه ومحتك بيه ومش قادر تواجه لعالم خيالى انت خلقته لنفسك او تحاول الهروب فيه لتقديم شخصية انت ترغب فيها وتحاول توصلها وبتلاقى فشل فى الطبيعة انك توصل للشخصية ديه
بمعنى اوضح
فكرة الهروب من الواقع لايجاد عالم جديد تقدر تبرز فيه مواهبك وافكارك و شخصيتك اللى فشلت انك تعملها على ارض الواقع هى فكرة
اراها تؤثر بالسلب على الشخصية ولك لعدة اسباب بسيطة
اولا
انت بتفرض على نفسك طوق من الانعزالية والوحده
ثانيا
تقمص شخصية انت مش هى الشخصية ديه يسبب اليك نوع من الاحباط الداخلى الى بيؤثر عليك فى انتاجك فى العالم الواقعى سواء كان انتاجك ده فكرى او عملى
ثالثا
وممكن تكون ديه نقطة ايجابية وسلبية فى نفس الوقت انك بتكتشف فى نفسك مواهب وافكار جديدة ولكن المشكلة انك مش قادر توقعن هذة المواهب والافكار
وبعد ده كله بتقع فى دوامة نقد الذات او جلدها والاحساس بالضعف والهروب
واخيرا وليس اخرا حاسس انى معرفتش اوصل فكرتى برضه
على العموم لو حد فهم انا كاتب ايه يا ريت يشاركنى برايه
7 comments:
أخويا أحمد
أنا قريت التدوينة الجامدة دى
و حسيت باللى إنت فيه
بسس تعرف إيه المشكلة
إنى مش عارف أقولك إيه
تحياتى
سلامو عليكم و رحمة الله و بركاته
صح معاك في كل كلمة انتا قلتها , بس مش كل الناس بتدخل النت علشان تعمل لها شخصيات في عالم خيالي بسبب انها مش عارفه تطبق الشخصية ديه علي الواقع ..
انتا نفسك تعرف ناس كتير من اللي شخصيتهم علي النت هيا هيا في الواقع
مثال : هشام البنا :)
نيجي بأه لنقطة انك بتقول ان ده بيؤثر سلبا علي الشخصيه في انه بيفرض علي نفسه طوق من العزله و الوحده .. بس انا شايف ان الموضوع عكس كده خالص
لأن الناس اللي انتا بتتعامل معاها علي النت ما هي بشر هيا كمان .. و زي ما بتتاعمل مع العالم الواقعي مع بشر بتكتسب منهم خبرات
زي ما بتتعامل برده مع ناس علي النت و بتكتسب منهم خبرات ..
و زي ما بتعمل حاجات علي الواقع ما ينفعش تتعمل علي النت ..زي ما في أعمال و حملات و أفكار لا يمكن تداولها الا عن طريق النت و المنتديات و المدونات
بس انا معاك ان اي حد علي النت بيحاول يظهر احسن حاجه في شخصيته و في طريقة تفكيره خصوصا علي المنتديات
بس ده ممكن برده يديله حافز بعد كده انه يكون كده في الواقع لما يلاقي انه يقدر يكون كده علي النت .
ممكن يكون اللي انتا بتقول عليه ده انتا حاسه في واحد صاحبنا
.. بس برده هرجع و اقول انها حاله خاصه بصاحبها و ما ينفعش تعممها علي الجميع ..
يللا سلام يا عمي :)
انا اتفق مع حضرتك في حال كانت فعلا الكتابة وسيلة للهروب من الواقع
انا بالنسبالي شخصيتي بالضبط زي ما بكتب بنفس الانطلاق وبنفس التعبير والاسلوب
بس في الكتابة بلاقي نفسي اكتر
في الكتابة يدي بتعرف تترجم اللي في عقلبي باسلوب هادي اكتر فبتجيب كلام قوي مقنع يقنع اللي ادامي بوجهة نظري
انا بحس الكتابة انطلاق في سماء الابداع واللي بيكتب بحس ان الدنيا عميقة اوي
مش عارفة انا بشجع الكتابة جدا ومع ذلك مش بجدها بتعترض على حياتي او بتبني لي احلاما وهمية
وحتى لو الاحلام دي موجودة بحسها بتزيد الحياة متعة بس لو حطينالها حدود وما خلينهاش تأثر على حياتنا الواقعية
اخيرا مدونة جميلة :)
صدقنى يا برنس
العملية مش محتاجة هروب من الواقع أو غيره
الحكاية كلها انك تقول اللى في نفسك وخلاص
وزي ما تيجي تيجي
انت هتتعب نفسك ليه وتحور عليها وعلى البنى ادمين اللى حواليك
اهم حاجة في الدنيا راحتك انت
قول اللى يهمك ماتحاولش ترضي حد على حساب نفسك
انا معك اخي الفاضل فيما تقول ولكن هؤلاء الذين تتكلم عنهم لايمثلوا النسبة الاكبر وانهم اقل
زوروني على مدونتيhttp://miikha.blogspot.com/
ارض الرمال للمصريين
http://anotherlandofsand.blogspot.com/
موضوع جميل جداً بارك الله فيك واهداك الى الطريق الصواب والطريق الامثل للتعبير عما هو في داخل وايصال الفكرة كما تريد
لمعرفة ما قام به رئيس الوزراء احمد نظيف من انجازات يسعدنا تشريفكم في مدونة ميخا
Post a Comment